السلام عليكم شباب
في حدا بألمانيا او النمسا بيدرس هندسة المعلوماتية بالجامعة السورية الافتراضية ؟
منقطع عن الدراسة من 8 سنوات تقريباً وعم فكر اسجل هندسة معلوماتية عندي خلفية منيحة عن الشبكات و السيرفرات ولكن للاسف ما اشتغلت بهالمجال ممكن اسمع منكم نصائح بخصوص هالمجال
3 إعجابات
هلا أخي محمد وعليكم السلام،
هل انا ما درست بهي الجامعة بس اذا انت عايش بألمانيا او النمسا ليش مابتدرس بجامعة أوروبية مو أحسنلك؟ أكيد رح يكونوا أحسن وأفضل من الجامعة السورية الافتراضية وبرأي بحال وضعك ما بيناسب تدرس بجامعة المانية في عندك اكتر من فرصة دراسية تدخلك سوق العمل بدون جامعة مثلا، فيك تعمل Ausbildung أو Weiterbildung وفي كمان Umschulung وهدول يلي ذكرتهن بدخولك سوق العمل فورا وبرواتب ممتازة.
الموضوع بيرجعلك اخي الكريم بس هاد مجرد رأيي الشخصي وحبيت فيدك وبتمنالك كل التوفيق.
إعجاب واحد (1)
وعليكم السلام ورحمه الله وبركاته
أنا عم ادرسها بسوريا، بالنسبة للجامعة بنصحك تتروى شوية على أمل يتم تحديث نظام الجامعة حتى ما تهبط همتك بس تبلش محاضرات 
لأن طريقة بث المحاضرات فيها جداً قديم وممل، المحاضرة مابتصل لل 30 فريم، وبكون في تقطيع أغلب الأحيان بالمحاضرات
بالنسبة لتسجيلك بالجامعة بيتطلب منك شهادة البكلوريا ومجموع يدخلك للفرع حسب تاريخ شهادتك (غالباً 90% أي 216/240 إذا شهادتك بهل 10 سنين أو 80% إذا أقدم)
الجامعة عبارة عن فصول دراسية كل فصل 6 مواد (أقلها 4 مع إمكانية إضافة لغة إنكليزية)
كونك طالب خارج سوريا سعر المادة الوحدة 150$ او يورو حسب البلد الموجود فيه
وفي عندك رسوم امتحان 100$ كل فصل أيضاً
بالنسبة للفرع في عندك 6 تخصصات: هندسة البرمجيات - الذكاء الصنعي - النظم والشبكات الحاسوبية - علم البيانات - الأمن السيبراني - تعلم الآله (اخر 3 اختصاصات تمت إضفاتهم حديثاً)
بالنسبة لآلية الدراسة والامتحانات:
لكل مادة وظيفة أو مشروع من 30 علامة، الوظيفة مشتركة نادراً لتكون فردية، طبعاً في وظيفة عندي كانت تحتاج ل 12 طالب ! طبعاً رسوبك بالوظيفة بيعني انك حملت المادة ومافيك تقدم فحص
كون الوظيفة تشاركية بدك تحاول تتعرف على ناس وتبني مثل فريق او مجموعة تتشاركو بالوظائف لأن حتصادف كثير ناس داخلة زيادة عدد، يعني ناس داخلة فرعين أو ناس دخلت معلوماتية لاسم المعلوماتية بدون أي متابعة او اهتمام للجامعة، بالإضافة في دكاترة بيعطو علامة إضافية للوظيفة من خلال الحضور
بالنسبة للحضور أغلب الدكاترة بيعتمدو نظام الجامع بالحضور بحيث دخلت دقيقة وحدة للمحاضرة تعتبر حاضر، ماصدفت غير دكتور واحد بياخد تفقد بايده 3 مرات بالمحاضرة
أما الامتحانات أغلبها امتحانات مؤتمتة، في كم مادة بيجي سؤال أو اثنين تحريري، الامتحان بيتم من خلال مركز معتمد للجامعةـ كونك خارجي إما بمركز تابع للجامعة أو بالسفارة السورية إن وجد
الرسوب:
في حال حصولك على مجموع (امتحان + وظيفة) أقل من 60/100 في عندك حالات:
- كل فصل الك علامتين مساعدة:
– 1. بتحصلها لمادة وحدة إذا علامتك 58 بشرط ما عندك مواد 59
– 2. لمادتين إذا كل مادة 59 - في حال العلامة 59.1 تعتبر ناجح
- غير الحالات السابقة تعتبر راسب وبس ترجع تقدم المادة لازم تدفع حقها وتقدم وظيفتها
النجاح:
ذكرت حالات النجاح فوق بس الترفيع من سنة لسنة بكون حسب عدد ساعات المادة، كل مادة الها عدد ساعات وحسب مجموع هل ساعات بتترفع وهي جدول لهل موضوع
المجمع أو طريقة التحدث مع طلاب بنفس الفرع:
بس تسجل بالجامعة بصير الك ايميل جامعي تابع للجامعة الافتراضية (الايميل .org وليس .edu) ويعتبر هذا الطريقة الاساسية والرسمية لتكلم الدكاترة او شي تابع للجامعة او حتى الطلاب
غالباً بكل سنة بكون في ناس مبادرين بإنشاء كروب وتس اب للفرع ومن هل كروب بتلاقي كروبات كثير
طبعاً باول محاضرة من كل مادة لح تلاقي في شخص عم يجمع ارقام الطلاب او يوزع رقمه لكروب المادة (بالمحاضرة بكون في chat كتابي بحيث إذا بدك تسأل دكتور او تتناقش مع الطلاب)
وطبعاً في حال سجلات وبدك كروبات او شي تتابع منه فيك تبحث بالتلجرام عن “SVU ITE” وبتلاقي قنوات او مجموعات
وأهم شي الجامعة معترف فيها والله 
لأن اكثر سؤال ممكن يتنسأل “الجامعة معترف فيها؟”
3 إعجابات
شكراً على كل والمعلومات الرائعة, هاد هو الجواب الي كنت انتظره عن الجامعة وعلى الاغلب استنى كمان فصل او فصلين لنشوف شو راح يصير بالنسبة لنظام الجامعة على امل التحديث بس اذا في مجال ممكن اذا عندك كتب السنة الاولى pdf تبعثلي اياهم او من وين ممكن احصل عليهم للإطلاع على المنهاج .
إعجابَين (2)
المشكلة الاولى الوقت والعمر انا بشتغل Maschine Bedienung بمصنع في النمسا .
انا درست فصل واحد هندسة معلوماتية في مصر ولكن للاسف ما كملت وبعد التحرير رجعت فكر بالجامعة الافتراضيه لانها اونلاين مشان موضوع شغلي مافيني اتركه و اتفرغ للجامعة فقط , فكرت بكورسات سيسكو للشبكات ولكن هون غالية نوعا ما .
انا حاب اتعلم اونلاين بس ما عم اعرف بالضبط من وين بلش او بشو مثلا حاب كثير ابدأ باللينكس .
عامل دبلومة شبكات الي هي اساسيات الشبكات و msca ولكن بدون الامتحانات الدولية في مصر 2014 .
بصراحة ضايع شوي خصوصاً المعلوماتية بحر .
إعجاب واحد (1)
العفو، بالنسبة لمواد السنة الأولى هي كالتالي:
مهارات الحاسوب - مدخل إلى التعلم الإلكتروني - الفيزياء - تحليل رياضي ( 1 ) - بنى جبرية - برمجة 1
مهارات التواصل والكتابة العلمية - تحليل رياضي ( 2 ) - الجبر الخطي - الدارات الإلكترونية - الدارات المنطقية - برمجة 2
اما بالسنبة للغة الإنكليزية 5 مستويات مع إمكانية تقديم إمتحان تحديد مستوى، بالنسبة لهي المادة أغلا من باقي المواد بضعف المبلغ مابعرف كم بال $ بس بالسنبة لداخل سوريا بكون سعرها دبل باقي المواد و 3 محاضرات بالاسبوع بدل 1 مقارنة بباقي المواد
طبعاً فيك تتعرف على المواد من هذا الرابط
اما بالنسبة للمواد فيك من خلال هذا البوت على التلجرام:
وبس تسجل بالجامعة ويتفعل حسابك في موقع مخصص للمواد بحيث بتقدر تفوت تحمل محاضرات كل مادة وتشوف أمثلة للوظائف وممكن الدكتور يحط مصادر خارجية، اما ككتب غالباً مافي
إعجابَين (2)
بالنسبة للدوام الجامعة تعتمد على نظام الصفوف classes بحيث كل مجموعة طلاب بتدخل عن دكتور معين ضمن صف وكل صف او دكتور توقيت شكل، ممكن تخلي كل محاضراتك بالليل وممكن بس تسجل حضور وبعدين تحضر لحالك (بس حاول بهذا الامر تحضر بس أول محاضرة أقلها لكل مادة)
إعجابَين (2)
أخي اذا عندك اهتمام انت مو بحاجة لدراسة جامعية أو أكاديمية خصوصا انو انت عايش باوروبا فخبرتك كافية ووفاية اذا قدرت تثبت نفسك. مبدئيا وبالنسبة للشهادات يلي فيك تعملها مثلا عندك، CompTIA Linux+ و CompTIA Server+، هدول الشهادتين بدخولك سوق العمل لحالهن اذا كان عندك فعلا خبرة مسبقا بأنظمة Linux ومواضيع السيرفرات. انا عم حكيك من تجربة شخصية لانو انا شغال بالسوق الألماني التقني من 2017 ومامعي أي شهادة جامعي ولا حتى معاهد أو شيئ من هاد القبيل. كل يلي عندي هو خبرة عملية وحب للتقنية.
بنصحك تمتحن الشهادات يلي خبرتك عليها وممكن ب 6 شهور تخلص الشهادتين وتمتحن فيهن وان شاء الله بيدخولك السوق فورا لانو الطلب بسوق تكنلوجيا المعلومات اوروبا اكبر ب 10 أضعاف من العرض لهيك فيك برياحة تزبط امورك ب Stelle مرتبة اذا متمكن لغويا.
وبس تلاقي حالك تمكنت وصار عندك خبرة عملية كافية بمشاريع Linux فيك تتوسع ك DevOps و Cloud وتذكر العمر ما بيلعب دور أبدا بالنسبة لتكنلوجيا المعلومات يعني لو كان عمرك 50 سنة وعندك خبرة أولية بالمجال فيك تتخصص وتشتغل بأرقى الشركات.
4 إعجابات
اخي انت هون عم تغيرلي تفكيري بالنسبة للجامعة مثل وقت بلشت بجامعة بمصر كل الدكاترة كانوا ينصحونا بكورسات وشهادات خارجية غير الجامعة ولهذا السبب اخذت كورسات سيرفرات مع ويندوز .
في عندك مصدر ممكن ترشحلي اياه اونلاين ابدأ اتعلم منه اللينكس وبعد ما اتعلم بعمل امتحانات الشهادات الي ذكرتيلي اياهم .
اخي والله للأمانه انا ما عم بيعك حكي وكل شي خبرتك ياه عن تجربة شخصية وتجارب مماثلة لأصدقاء ألمان بكل شركة شتغلت فيها وهنن كانوا مستلمين أقسام تقنية كاملة وماحدا منن عنده شهادة جامعية وحبيت فيدك بس. بالنسبة للمصادر الدراسية فيني اعطيك مصادر مدفوعة بتقدم كورسات احترافية باللغة الانكليزية اذا بيناسبك لانو للأمانة المحتوى العربي يفتقر للشمولية والاحترافية وممل نوعا ما.
إعجاب واحد (1)
تماما اخي قصي بعرف هالكلام والله خصوصاً هالمجال الشهادات الأكاديمية فيه ما بتفيد اذا الشخص نفسه ما عنده اهتمام او خبره فيه . الله يجزيك الخير ما قصرت .
إعجاب واحد (1)
شوف أخي الشركات التالية، هنن الأفضل بالسوق حاليا من ناحية الشمولية والجودة ويمكن تلاقي الاشتراك غالي شوية نوعا ما بس رح تحصل على كورسات مقدمة بطريقة احترافية وشمولية وبتناسب سوق العمل الحالي وهنن دائما up-to-date.
واذا ميزانيتك محدودة ممكن تعتمد مبدئيا على Udemy بس مارح تكون الكورسات بالجودة المطلوبة بس بتلبي الغرض منها.
إعجابَين (2)
الأخ يحيى ما قصر و شرحلك ما يجب معرفته بس في نقطة و هي انو موضوع الحضور ليس ذو أهمية
خاصة لشخص عنده شغل رح يشوف ميزة عدم الالتزام بالحضور بجامعتنا شيء لصالحه و لمصلحته
أي نعم برامج الجامعة فيها عيوب لكن الغالبية العظمة من الطلاب ما تلتزم بالحضور لسببين:
الأول مشاغلهم الثانية اللي ما تسمحلهم يحضرو أونلاين
الثاني هو أنو مجال مثل مجال هندسة المعلوماتية كلنا نعرف أنو التعلم فيه ذاتي أكثر من كونه تعلم أكاديمي لهيك تلاقي الطلاب المتميزين حتى ما يلتزمو بالحضور ( رغمانو مقررات جامعتنا دائما في حالة تحديث و قوية جدا اذا ما قارناها بجامعات سورية ثانية )
طيب لو الطالب ما حضر شو ممكن يصير ؟
ما بصير شي
في بعض الدكاترة تزيد علامات للطلاب اللي تحضر لكن ما ترسب حدا أبدا أو تظلم بتصحيح العملي فقط لانك ما حضرت
طيب وقت الدراسة للامتحان ما رح احتاج احضر محاضرات ؟
مو شرط، الموضوع يرجع للمادة
في مواد تندرس من ملخصات لانها مو مهمة جدا مثل مدخل الى التعليم الالكتروني ( و هيك مواد موجودة بس بأول كم فصل طبعا)
و في مواد لا لازم تحضر مع الدكاترة أوفلاين لحتى تقدر تفهم ( بعض المواد في طلاب يتكفلو بتحويل صيغة المحاضرات ل mp4 و يرفعوها تلجرام ليساعدو بقية الطلاب و ممكن أنت بنفسك تقوم بهي العملية مو صعبة )
الهدف من كلامي هو أن أوضح لك فكرة مفادها أن برمجيات الجامعة ليست عقبة في وجهك
و أنصحك لو حابب تسجل فسجل بأقرب مفاضلة لأن فصل عن فصل ممكن تزيد المفاضلة ( ك معدل مطلوب و ك سعر حتى ) خاصة أنو انتو طلاب الخارج عليكم تكاليف زيادة أكتر من طلاب الداخل، و لو عندك ضيق بالوقت لا تنزل عدد كبير من المواد كل فصل.
بالتوفيق ان شاء الله
4 إعجابات
كطالبة في الجامعة الافتراضية ارغب باضافة ملاحظة بسيطة
ماذكره الاخوة مشكورين بما يتعلق بنظام الجامعة صحيح و كافي تماما , ولكن انا اشجع كلام الاخ قصي , العمل في مجال البرمجة لا يحتاج الى شهادة يل يحتاج الى خبرة عمليه و فهم للاساسيات البرمجية , لذا الجامعة ليس سبيل للوصول لسوق العمل,
الان كطالبة اعاني من صعوبة في التوفيق بين مواد الجامعة الالزامية التي اجبر على دراستها فقط لمحاولة النجاح و التخرج و وبين حضور الكورسات العملية التي احتاجها للاساس البرمجي .
كما ان المواد في السنتين الاولى و الثانية تعتمد بشكل كبير على معلومات البكالوريا السورية , اي ان طلاب الخارج يعانون كثيرا بهذه الجزئية و هذا امر رأيته بشكل شخصي.
في النهاية ان كان هدفك الشهادة الجامعية فهي خيار جيد نوعا ما ولكن انتبه فدول الخليج لا تعترف بما يسمى التعليم الافتراضي , اما ان كان هدفك الوصول الى الخبيرة البرمجية الكافية فانت تحتاج الى مصدر موثوق يمتلك خارطة واضحة تساعدك للوصول الى سوق العمل , وبهذا تختصر الكثير من الوقت و الجهد.
ملاحظة : الدراسة في الجامعة تستغرق 5 سنوات و قد يتخرج الطالب دون الحصول على ادنى الاساسيات , ولكن الخبرة البرمجية تحتاج الى سنتين على الاكثر لتصبح رائدا في هذا المجال.
إعجابَين (2)
وعليكم السلام
بصراحة ما بنصحك أبدا بالوقت الحالي
لأنو مواد الجامعة بعيدة كل البعد عن التطور الكبير الحالي بالتكنولوجيا ولما تخلص ما رح تكون مؤهل للعمل أبدا
ف إذا فيك تدرس برا أفضل بكتير
أو فيك تنطر ع أمل يتحسن مستوى التعليم والمواد عنا
إعجاب واحد (1)
بالنسبة للدفع كيف ؟ يعني مثلاً السنة قدي بتكلف الواحد