يلي لاحظته اليوم انو بقطاع الشركات الناشئة في سوريا (Syrian Startups) أكبر غلطة بيرتكبها المؤسسون (Founders) هي هوس الـ Building from Scratch والبحث عن “كود مثالي” بمرحلة الـ MVP، وتجاهل أهمية سرعة الدخول للسوق.
يعني بتحرق ميزانيتك على رواتب مبرمجين أو فريلانسرز بيسلموك كود سباغيتي غير قابل للتوسع، وبتوصل ليوم الإطلاق وميزانية التسويق “صفر” أو حتى بشك انو يكون محسوب حسابها أساسا.
من هاد المنطلق حابب سلط الضوء على كم نقطة ممكن يساعدوك توفر 70% بالمية من الميزانية المخصصة لتنفيذ الجانب التقني من مشروعك التقني ان كان متجر الكتروني, تطبيق موبايل او حتى الاثنين مع بعضهم.
هلئ كيف فيك توفر 70% من ميزانيتك التقنية؟ (الخلطة السرية):
الاستراتيجية الأولى هي الـ Boilerplates: بدل ما تبني لوحة التحكم وال Backend ونظام الدفع من الصفر، استثمر بـ SaaS Boilerplates جاهزة. أنت هون عم تشتري بنية تحتية (Architecture) اختبرها مئات أة آلاف المطورين، بسعر زهيد مقارنة بتكلفة توظيف فريق برمجي كامل ليشتغلولك مشروعك البرمجي.
يعني بعتقد المبرمج بيحس بـ “إهانة” إذا استخدم كود جاهز أو Library حدا غيره كاتبها. بيقلك: “أنا بعمل أحسن منه”.
النقطة الثانية هي التوظيف للـ Customization مو للـ Core Dev: بدل ما توظف مبرمج مبتدئ يبني “الأساسات” ويخبص ويسلمك كود بعيد سفر سنة عن ال Clean code, وظف مبرمج محترف ليعمل Refactoring وتخصيص للواجهات يلي انت مشتريها مسبقا جاهزة لتناسب الهوية البصرية لمشروعك. هيك بتضمن Time-to-Market سريع جداً.
إعادة توجيه الميزانية (FinOps): الـ 70% اللي وفرتها من تكاليف التطوير، هي قوتك الحقيقية. خصصها ل Marketing Campaigns. تذكر دائماً: “Great Code doesn’t sell itself”.
الـ PWA بدل الـ Native App (التوفير الأكبر): ليش تبرمج تطبيق أندرويد وتطبيق iOS وتوظف فريقين؟ تقنية الـ Progressive Web Apps بتخليك تبني كود واحد بيشتغل عالمتصفح وكأنه تطبيق موبايل. بتوفر 50% من تكلفة التطوير والصيانة.
كل دولار بتوفره من “اجرة المبرمج”، لازم ينحط فوراً بـ “إعلان ممول” أو “تحسين ال UX”. لأنو ببساطة: تطبيق “أبو نص ليرة” مع تسويق قوي ممكن بينجح اذا الفكرة مطلوبة وبتحل مشكلة، بس تطبيق “عظيم ومتعوب عليه” بدون تسويق بيموت بصمت وهاد من تجربتي الشخصية من مشاريع أطلقتها سابقا ولهلئ عم اتعلم منها.
خليني احكيكم بلغة الأرقام ومن واقع تجربتي الشخصية بمشاريع حية اليوم: منصة SyrianDEV (المطور السوري): التكلفة التأسيسية؟ 0 يورو. كيف؟ اعتمدت بنسبة 100% على أدوات Open Source، واستغلال ذكي للـ Free Tiers بخدمات الاستضافة الحديثة، بدون ما ادفع ليرة عالسيرفرات.
منصة SyriaMotors: مشروع تجاري شغال، ترافيك وداتا.. قديش فاتورته الشهرية؟ 10 يورو فقط! (حق VPS مضبوط صح). لو مشيت عالطريقة التقليدية (Cloud و Microservices وهالقصص) كانت الفاتورة رح تكون 200$ وفوق.
لهيك ياصديقي، لا تخلي كبريائك التقني يمنعك تستخدم الـ Open Source أو الحلول الجاهزة. النجاح إنك تبني “بزنس” حقيقي يحل مشكلة لهيك ابدأ صغير (Start Lean)، استخدم أدوات جاهزة، بيع، ولما يحقق البزنس تبعك أول 100k، وقتها منكتب الكود من الصفر ومنعمله Open Source كمان 
.