نحنا أغلب الوقت عم نكون نشيطين على وسائل التواصل الاجتماعي وبحكم أني صرلي مدة بفتح المنصة وبلاقيها خامدة. مافي شي جديد ونسيانين أنو في عنا مساحة حلوة كتير هون لنتبادل الأفكار والفائدة بين بعض بأمان أكتر من باقي المنصات.
متل مابتعرفو الفيس وانستغرام مليانين وجع راس وإعلانات ممولة ومحتوى بلا أي فائدة.
خلينا نستغل هالمساحة النصيفة ولا ننسا أنها تصممت بأيادي عربية والي صممها منا وفينا.
أنا رح ابدأ من عندي بإذن الله وهاد المنشور تشجيع ألي ولغيري لحتى نبلش ننشر محتوى مفيد ونخلي الناس تشتهي تنضم ألها وتتعرف عالناس الراقية الي فيها ونتشارك الفائدة والمعرفة…
وبما أن هدف المنصة تجمع المطورين والمفكرين السوريين أنا جيت أسألكن عن شغلة ماعم لاقيلها جواب كـمطور.. موقع (الليرة اليوم) يلي أغلب السوريين بيعرفوه، مين المسؤول عنو؟
هل يعقل موقع بدون أي وثائق رسمية يتحكم بسعر عملة بلد كاملة. وين دور الحكومة؟ من وين عم يجمعو البيانات؟ أو مين هو الي عم يجمع البيانات بصفته مين و مين خوّله؟
إذا في حدا عندو إجابة أو تفسير يحكيلنا.
كل الشكر للقائمين على تطوير هالمنصة ، بتمنى نستمر ونتساعد لنبني بيئة تواصل نضيفة ونافعة ألنا ولولادنا.